عرفان ستار

 #معروف_شاعر_عرفان_ستّار_کا_یوم_ولادت

عرفان ستّار 18 فروری 1968 کو کراچی میں پیدا ہوئے۔ ابتدائی تعلیم لیبیا کے شہر البیضا میں حاصل کی جہاں ان کے والد جو ڈاکٹر تھے، بغرضِ ملازمت مقیم تھے۔ لیبیا سے واپسی پر کراچی کے بی وی ایس پارسی ہائی اسکول سے میٹرک، اور ڈی جے سائنس کالج سے ۱۹۸۶ میں انٹر اور ۱۹۸۹ میں بی ایس سی کیا۔ ۱۹۹۲ میں انسٹیٹیوٹ آف بزنس ایڈمنسٹریشن (I.B.A.) سے MBA کی تعلیم مکمل کی۔ چند برسوں بعد ۲۰۰۴ میں SZABIST, Karachi سے مینیجمنٹ سائنس میں MS کی ڈگری حاصل کی۔ مختلف اداروں میں اعلٰی عہدوں پر فائز رہے۔ ۲۰۱۰ میں کینیڈا منتقل ہوگئے اور اب ٹورنٹو میں مستقل سکونت ہے۔

شاعری کا آغاز کالج کے دنوں میں ہوا، اور ڈی جے سائنس کالج کے مجلّے ’’مخزن‘‘ کے ایڈیٹر بھی رہے۔ ۱۹۹۵ میں جون ایلیا سے ملاقات کے بعد تخلیقی معاملات میں سنجیدگی آئی اور ادبی جریدوں میں کلام شائع ہونا شروع ہوا۔ پہلا اور تاحال شعری مجموعہ ’’تکرار ِ ساعت‘‘ ۲۰۰۵ میں شائع ہوا اور ادبی حلقوں میں بےحد پذیرائی سے نوازا گیا۔

شاعری میں غزل ان کی محبوب ترین صنف ہے۔ شاعری کے علاوہ تنقیدی مضامین اور کتابوں پر تبصرے بھی لکھتے رہے اور اردو کے روزنامے جسارت کے ادبی صفحے کے لیے کیے گئے ان کے انٹرویوز بھی ادبی حلقوں میں بہت اہم سمجھے جاتے ہیں۔

#منتخب_کلام

تجھے یہ ضد ہے مگر اس طرح نہیں ہوتا

کہ تو بھی زندہ رہے داستاں بھی زندہ رہے

۔۔۔۔۔۔۔۔۔

ہاں ویسے تو حجرہِ جاں میں بے ترتیبی ٹھیک نہیں

لیکن کیا ترتیب سے رکھوں، سب کچھ درہم برہم ہے

۔۔۔۔۔۔۔۔۔۔۔

نہیں نہیں، یہ بھلا کس نے کہہ دیا تم سے؟

میں ٹھیک ٹھاک ہوں، ہاں بس ذرا اداسی ہے

۔۔۔۔۔۔۔۔

وہ ایک پل ہی سہی جس میں تم میسّر ہو

اُس ایک پل سے زیادہ تو زندگی بھی نہیں

۔۔۔۔۔۔۔۔

شام ہوتے ہی لگاتے ہیں درِ دل پہ صدا 

آبلہ پا ہیں ، اکیلے ہیں ،اماں چاہتے ہیں 

۔۔۔۔۔۔۔۔۔۔

اک چبھن ہے کہ جو بے چین کیے رہتی ہے

ایسا لگتا ہے کہ کچھ ٹوٹ گیا ہے مجھ میں

۔۔۔۔۔۔۔۔

ﺗﯿﺮﮮ ﻟﮩﺠﮯ ﻣﯿﮟ ﺗﺮﺍ ﺟﮩﻞ ِ ﺩﺭﻭﮞ ﺑﻮﻟﺘﺎ ﮨﮯ

ﺑﺎﺕ ﮐﺮﻧﺎ ﻧﮩﯿﮟ ﺁﺗﯽ ﮨﮯ ﺗﻮ ﮐﯿﻮﮞ ﺑﻮﻟﺘﺎ ﮨﮯ

ﺗﯿﺮﺍ ﺍﻧﺪﺍﺯ ِ ﺗﺨﺎﻃﺐ، ﺗﺮﺍ ﻟﮩﺠﮧ، ﺗﺮﮮ ﻟﻔﻆ

ﻭﮦ ﺟﺴﮯ ﺧﻮﻑ ِﺧﺪﺍ ﮨﻮﺗﺎ ﮨﮯ ﯾﻮﮞ ﺑﻮﻟﺘﺎ ﮨﮯ؟؟

۔۔۔۔۔۔۔۔

زباں پہ حرف ِ ملائم بھی، دل میں کینہ بھی

عجیب شخص ہے، اچھا بھی ہے، کمینہ بھی

۔۔۔۔۔۔۔۔

‏تیرے ماضی کے ساتھ دفن کہیں

‏میرا اِک واقعہ نہیں، مَیں ہوں

۔۔۔۔۔۔۔۔۔۔

فقیہ ِ شہر کی ہر بات مان لو چپ چاپ

اگر سوال اٹھایا، تو زندگی سے گئے

نہ پوچھیئے کہ وہ کس کرب سے گزرتے ہیں

جو آگہی کے سبب عیش ِ بندگی سے گئے

۔۔۔۔۔۔۔۔

پھونک دی جاتی ہے اس طرح مرے شعر میں روح

جیسے سانسوں میں کوئی کن فیکوں بولتا ہے

۔۔۔۔۔۔۔۔

میں گفتگو کا نہیں، سوچنے کا عادی ہوں 

سو میں نے عشق بھی تجھ ایسے کم سخن سے کیا 

۔۔۔۔۔۔۔

ہم بھی حیراں ہیں بہت خود سے بچھڑ جانے پر

مستقل اپنی ہی جانب نگراں تھے ہم بھی

اب کہیں کیا، کہ وہ سب قصہءِ پارینہ ہُوا

رونقِ محفلِ شیریں سخناں تھے ہم بھی

۔۔۔۔۔۔۔۔

اس عہد بد لحاظ میں ہم سے گداز قلب 

زندہ ہی رہ گئے تو بڑا کام کر گئے

۔۔۔۔۔۔۔۔۔

میری غزل میں ھے کسی لہجے کی بازگشت

اک یار ِ خوش کلام و طرح دار مجھ میں ھے

حد ھے، کہ تُو بھی میری اذیّت نہ پڑھ سکا

شاید کوئی بلا کا اداکار مجھ میں ھے

۔۔۔۔۔۔۔۔۔

ایک ھی سمت ھر اک خواب چلا جاتا ھے

یاد ھے یا کوئی نقشِ کفِ پا ھے مجھ میں؟

مجلسِ شام ِ غریباں ھے بپا چار پہر ۔۔۔۔ !!

مستقل بس یہی ماحولِ عزا ھے مجھ میں

۔۔۔۔۔۔۔۔

تری تمام ریاکاریوں سے واقف ھوں 

یقین کر بڑا لطف اس نباہ میں ہے

(بہ شکریہ اردو کلاسک)

Irfan Sattar